Ta na su lugar pa LNG duna un presentacion tambe na Parlamento manera a haci na Gobierno

Parlamentario Raymond Kamperveen di RAIZ

ORANJESTAD (AAN) – Parlamentario Raymond Kamperveen, di fraccion di partido RAIZ, tambe a hiba palabra den conferencia di prensa, Diahuebs mainta. El a cuminza expresando cu e fraccion ta trahando pa pueblo di Aruba constantemente.

Kamperveen a trece dilanti cu loke su persona y su colega Mishi ta haciendo pa hopi dia, ta duna siguimento specialmente na mocionnan cu nan mester cambia of wak pa cosnan wordo haci.

Den caso di su persona, constantemente e ta duna siguimento na e proyecto di LNG. Esaki ta hopi importante pasobra aña 2024 teynan mes, y nan no ta mira ningun movecion.

E parti mas importante cu RAIZ ta carga ta naturaleza y fraccion di RAIZ kier sa con a bay cu e evaluacion di impacto social riba medio ambiente, y nan a compronde door di haci pregunta y busca mas informacion, cu e ta na Departamento di Naturaleza y Medio ambiente (DNM), pa nan duna nan bisto bueno. Si esaki a sosode no ta conoci, pa asina e por haya oficialmente su vergunning.

E parlamentario a subraya cu RAIZ ta para pa cambio, y LNG ta e transicion, pero e mester bay man den man cu naturaleza.

Mirando cu LNG e siman aki, a duna un presentacion na gobierno e ta kere cu ta na su lugar pa nan haci esaki pa Parlamento tambe, pa sa con leu nan ta, pasobra pa hopi tempo no a tende nada di nan, y no solamente pa RAIZ pero pa henter pueblo di Aruba sa con a para cu e proyecto aki.

Otro tema cu Kamperveen a toca ta un presentacion cu nan a haci tocante “online payment” pa e industria creativo. Esaki ta algo hopi importante y nan a haya bon reaccion riba dje.

El a agrega cu nan a bay diferente caminda pa haya conseho y prome cos cu nan a wordo bisa ta, cu nan tin cu haci un estudio. Den e caso aki, nan  ta acercando Universidad di Aruba pa nan haci un estudio pa e fraccion, pa wak den e añanan 2023-2024 kico ta e posibilidadnan y sigur, conhuntamente, cu Banco Central di Aruba.

“Eynan nos ta pega y mirando cu na aña 2012 ya caba a tuma lugar un estudio di esaki y a bin resulta cu el a pega na Banco Central y Gobierno di Aruba”, Kamperveen a duna di conoce.