Defensa di economia como fuente social mester ta central!

Competencia vivienda local vs. turismo a haya gran atencion

Turismo di Aruba ta basa riba excelencia di e producto
Un isla sigur mester vigila su clasificacion como destino 

ORANJESTAD(AAN)- Durante e siman cu a termina, uno di e topiconan basico di DIARIO tabata, e competencia cu tin actualmente na nivel mundial y na Aruba tambe, pa cambia vivienda di ciudadanonan den acomodacion barata pa turista.

E impacto enorme cu esaki tin riba personanan cu mester di un vivienda, ta bini dilanti.

Democracia a triunfa na momento cu Ministro Geoffrey Wever a drenta den accion pa conduci un investigacion den e materia, mientras cu di parti di doñonan di acomodacionnan mas barata pa turista tambe drenta reaccion.

Cu Aruba tin necesidad di acomodacion pa tur turista, ta algo logico. DIARIO a ilustra uno di e problemanan social importante di habitantenan cu ta mira peso di bida subi cu prijs di vivienda.

Pero den e creacionnan moderno di acomodacion, no mester perde for di bista uno di e puntonan importante pa sector di turismo, cu ta e clase di turista cu Aruba ta atrae na tur nivel di turismo y cu ta basa riba excelencia.

E forma cu servicio ta wordo duna na Aruba, hancra den e nivel halto di bida y e naturalesa cordial y amabel di e Arubiano, ta e puntonan cu no por perde for di bista si kier mira interes di economia di e pais, cu ta sirbi hende y comunidad, ta duna empleo na cantidad riba terenonan diversifica y ta percura pa entrada di e pais, cu asina por cuida e bienestar di su ciudadanonan.

E sistema di cambia cambernan den acomodacion pa turista, transforma apartamentonan cu tabata destina pa publico local den acomodacion turistico sin adaptacion necesario, ta peligroso pa e pais y hasta na final pa e calidad di bida na Aruba, cu ta depende di turismo como pilar economico.

No awe, pero hopi tempo pasa, empresarionan chikito, cu a reconoce e necesidad di acomodacion mas barata, a introduci na Aruba apartamentonan cu ta destina pa acomoda turistanan.

Awe nos no ta papia di e proyectonan sumamente importante aki, cu ta parti integral di turismo na Aruba, cu mester por acomoda persona cu menos entrada tambe.

“Resort” ta un termino cu a haci su entrada na Aruba hopi tempo pasa y a uni na otro tiponan di acomodacion mas barata (pa loke ta trata placa) manera loke den exterior ta yama motel y historicamente “posada” (herberg).

Hende cu ta biaha mester di acomodacion pero cu ta honra nan bienestar y di economia di e pais.

DIARIO for di inicio a enfatisa cu Aruba conoce bon acomodacion turistico den forma di compleho di apartamento pa turista, cu ta basa nan mes riba normanan internacional pa atende cu turista.

E empresarionan tras di e complehonan aki, cu a sostene sigur e turismo for di Latino America cu a uza Aruba como centro di compra of pa relaha segun e entrada cu nan tin, ta tene nan mes na e normanan di excelencia riba nan tereno.

Excelencia ta exigi bon servicio, bon grado di higiena, seguridad pa e turista y asistencia necesario di empresarionan responsabel cu ta maneha e acomodacionnan.

Problema ta bira, ora apartamentonan cu a wordo construi pa publico local, sin mas wordo cambia den acomodacion turistico.

Excelencia ta muri na casnan cu ta acomoda turista den barionan peligroso sin seguridad.

Kico e reglanan di seguridad ta encera pa e turista y pa e propietarionan? E condicionnan fisico di e acomodacion y e mueblenan.

Segun e concepto di Bed and Breakfast, cuminda ta wordo prepara pa e turistanan. Con? E personanan en cuestion ta bay haci e chekeonan di salud necesario?

Turismo ta un sector vulnerabel. Turismo ta peligroso pa e persona cu ta fungi como empresario pero no a prepara su mes bon.

Un turista cu slip por bira un peso enorme pa e persona cu a huur e acomodacion di buena fe, pero cu e turista por persigui pa pago di su gastonan medico.

Kico ta pasa si un turista bisa cu el a perde su prendanan? Con a regla e asunto aki?

DIARIO como matutino di Aruba, mester mira y defende bienestar di tur hende.

Mundialmente “bed and breakfast” a bira popular pa e prijs abou cu e turista ta paga. Pero na e momento cu un cacho mester core su tras, problema por start.

Aruba ademas mester tene cuenta cu inversionistanan di otro pais, cu ta cumpra cas na Aruba y ta transforma e acomodacion local den acomodacion pa supuesto turista. Un fenomeno, cu mas y mas ta bini dilanti y a crea victima.

Turismo ta e fuente di economia di Aruba. Mester cuida loke ta entrada di e pais y hunto yega na solucionnan pa bienestar di Aruba, cu hasta den tempo di baca flaco a halza e copa di excelencia, cu ta e distincion entre gana placa bruto y gana placa na un forma cu ta beneficia e persona envolvi y su pais.