Den e proyecto di Ex Codemsa ta bay incorpora un ‘cel complex’ pa atende cu mas capacidad di cel pa e detenidonan

Black Immigrant Daily News

Minister Rocco Tjon:

ORANJESTAD (AAN):  Minister di Husticia, Rocco Tjon a duna di conoce dialuna den un conferencia di prensa cu pa loke ta e celnan na warda di polis, no ta e caso cu nan tambe a wordo renoba.

            El a splica cu no a scoge pa haci esey. Pa loke ta trata amplia e capacidad di celnan pa detenidonan, den e proyecto di Ex Codemsa, cu dentro di poco ta bay presenta e concepto aki na Parlamento, den cuadro di e proyecto ey ta incorpora un cel complex pa di e forma por atende cu e parti ey, a indica.

            Tjon a aclaria cu Warda di Noord, cu a caba di wordo renova, lo keda un warda di polis cu ta wordo ubica cu agentenan policial. Den e caso aki Motor Unit ta situa den e edificio ey. Ta un warda di polis caminda tur hende por acudi.

            Pa loke ta warda di polis na Shaba y Santa Cruz, esaki ta proyectonan cu a wordo inicia hopi aña pasa pa medio di un construccion di un PPP. Pa loke ta aspectonan di mantencion, entre otro, nan ta incorpora caba den e contractnan cu tin.

            Ora ta trata kehonan di edificionan, semper ta tende ta trata di warda na Wilhelminastraat, warda na San Nicolas, cu ta e dos edificionan cu ta den e mesun construccion di Shaba y Santa Cruz, y San Nicolas cu ta atendiendo cu tur e retonan infrastructural aworaki pa loke ta e parti di beskem , airconan, etc, e mandatario a duna di conoce.

            E proyectonan ta bay segun planificacion, Minister Tjon a bisa. San Nicolas a haya su atencion. Algun tempo atras henter e cel complex a wordo renoba pa asina por cumpli cu standardnan  cu ta wordo emiti di entre otro CPT.

            Pa loke ta e parti di beskem, tin un compania dedica na esaki pa atende cu e parti di humedad. A instala e diferente ekiponan tambe pa por percura pa monitorea esaki. Na fin di aña lo evalua cual di e dos companianan ta dunando e mihor resultado, pa por asina por bay den un mihor relacion a termino largo.

            E mandatario a agrega cu banda di esey, tur e airconan na warda di polis San Nicolas lo wordo cambia. Esaki consecuentemente tin su efecto riba e parti di humedad y beskem.

NewsAmericasNow.com

Source link