Nacionnan Uni ta confirma e pronosticonan di DIARIO pa futuro
*2024 lo ta aña di eleccion pa Union Europeo y Presidente Merca
*Violencia creciente na Ukraine ta peliger pa mundo sin hamber
ORANJESTAD(AAN)—Mas guera y mas confrontacion na mundo, ta pone e plannan di Nacionnan Uni pa elimina miseria na mundo, na peliger.
Esaki tabata uno di e ponencianan mas importante cu a wordo presenta den e analisisnan cu DIARIO hunto cu expertonan riba tur tereno, ta ofrece na su lectornan pa loke ta trata e futuro nobo cu a wordo diseña.
Manera ta conoci na 2015, Nacionnan Uni a bini cu e plan pa tuma medidanan internacional necesario pa asina ataca e loke ta conduci na hamber y miseria y habri caminda pa un mundo nobo.
Na entrada di 2030, mester por a papia di e base pa un mundo nobo, cu lo a vence e mayoria di e problemanan social internacional y habri porta pa un mundo nobo.
Na momento cu e Secretario General di Nacionnan a papia di e situacion mundial na inicio di 2023, el a mustra riba e tantisimo problemanan cu mundo mester soluciona y den cual paz y trankilidad mundial mester haya tur atencion.
Violencia y hostilidad mester wordo elimina pasobra manera el a confirma den su discurso, sin trankilidad mundial no por planta e semianan pa felicidad di hende a base di paz, derecho economico y desaroyo, accion di clima, respet pa hende cu ya ta parti di mundo y generacionnan cu ainda mester bini.
Un cambio grandi mester presenta su mes na mundo, segun e dirigente di Nacionnan Uni, mientras union tabata e palabra mas aleha for di realidad mundial ayera na inicio di 2023, cu lo conoce ehecucion di varios plan na favor pero tambe situacionnan cu normalmente ta crea problema na paisnan grandi y importante pa paz mundial.
Mester mira e hende pa por yega na e solucionnan cu e plan pa 2030 di Nacionnan Uni tabata encera y cu awor lo mester wordo ehecuta tambe pa tur pais di mundo.
Añanan 2023 y 2024 lo bira sumamente importante pa mundo cu lo conoce eleccion na diferente pais.
Eleccionnan durante uno di e crisisnan mundial mas severo cu a azota mundo den hopi tempo y cu por wordo considera confrontacion mundial, cu directamente ta afecta paz y bienestar di hende.
Na November 2024 Merca lo mester scoge un Presidente nobo. Esaki ta nifica cu ya e escenarionan politico pa yega na e fecha aki ta wordo prepara.
E partidonan participante mester cuminsa dicidi pa nan candidatonan cu den eleccion primario na inicio di 2024 lo wordo postula.
Kende lo confronta kende den e eleccion na Merca na 2024, sin ta un asunto cu ta conduci na duda, ora keda realista riba diferente tereno.
Europa tambe ta pendiente di 2024, ora pa prome bez for di salida di Inglatera for di Europa, eleccionnan pa Parlamento Europeo lo tuma lugar.
See also
Kico lo pasa na Ukraine ta keda e pregunta grandi cu ofensivonan fuerte atrobe.
Na mes momento solucion mester wordo busca pa paisnan cu ta origen di migrantenan, cu ta representa uno di e problemanan mas serio na mundo.
2020 tabata un aña bisiesto, un leap year, un schrikkeljaar, cu cual mundo lo topa atrobe na 2024.
Prome cu e bati na porta Nacionnan Uni lo bini hunto pa prepara pa e Reunion pa Futuro na 2024.
DIARIO ta sigui vigila futuro, cu ta depende na prome lugar di paz mundial, manera a keda confirma dor di e Secretario General di Nacionnan Uni na inicio di loke mester a bira e regreso real pa normalidad for di momento cu 2020 a basha mundo abou.
Discussion about this post