Black Immigrant Daily News
Den Dia Internacional di Turismo:
ORANJESTAD (AAN) – Awe, diamars 17 di September, ta Dia Internacional di Turismo y na mayoria pais rond mundo, e dia aki ta wordo celebra, como cu e ta un di e fuentenan di entrada mas importante pa e economia mundial, ademas cu e ta ofrece un mercado laboral hopi amplio y diverso, pa cantidad di famianan na henter mundo.
Tin un articulo skirbi na aña 2011, pa un investigador riba e desaroyo di turismo, yama Edwin Andres Rodriguez Pulgarin, cu a realiza un estudio extenso cu ta data desde e Edad Antiguo te cu Edad Moderno, y logicamente e turismo a desaroya drasticamente den nos Epoca Contemporaneo te awe.
Desaroyo: Rodriguez Pulgarin ta splica cu turismo como tal, a nace den siglo XIX, como consecuencia di e Revolucion Industrial, cu desplazamento humano cu e intencion principal tabata e ocio, descanso, cultura, salud, negoshi of relacionnan familiar.
E movecionnan aki a caracteriza nan mes pa nan finalidad di otro tiponan di viahe motiva door di guera, desplazamento migratorio, conkista, comercio, entre otro. No obstante, e evolucion di turismo tin antecedentenan historico basta cla.
Edad antiguo: Na Grecia clasico nan tabata duna hopi importancia na e ocio y e tempo liber tabata wordo dedica na cultura, diversion, religion y deporte. E desplazamentonan mas destaca tabata esnan cu tabata wordo realiza cu motibo di asisti na e Weganan Olimpico di Edad Antiguo, den e ciudad di Olimpia, cu miles di hende tabata bishita y na unda tabata mezcla religion y deporte. Tambe tabata existi peregrinacionnan religioso, manera esnan dirigi na e oraculonan di Delfos y Doloma.
Edad medio: Durante Edad Medio a surgi, na cuminzamento, un retroceso debi na e mayor conflictividad y recesion economico consiguiente. Den e epoca aki tambe a surgi un tipo di viahe nobo: e peregrinacionnan religioso. Esakinan ya caba a existi den e epoca antiguo y clasico pero tanto e Cristianismo como e Islam tabata extende nan na un mayor cantidad di creyente y e desplazamentonan a bira mas grandi.
Tabata famoso e expedicionnan for di Venecia pa Tera Santo y e peregrinacionnan door di e Caminda di Santiago (for di 814 cu a descubri e graf di e santo). E peregrinacionnan a bira continuo na henter Europa, y nan a traha mapa, meson, y tur tipo di servicio pa e caminantenan. Den e mundo Islamic e Hajiad of peregrinacion na e Mecca, ta un di e cinco pilarnan di Islam cu ta obliga e creyentenan na e peregrinacion aki, alomenos un bez den nan bida.
Edad moderno: E peregrinacionnan a continua durante Edad Moderno. Na Roma a muri 1500 peregrino door di e Pest Bubonic. Tabata na e momento aki cu e prome alohamiento bao nomber di hotel, a aparece. Esaki ta un palabra Frances cu cual a designa e palacionan urbano.
Como cu e personalidadnan grandi tabata viaha acompaña di nan comitiva, cual tabata crece hopi, di manera cu a bira imposible pa aloha nan tur den un palacio, y pesey a crea e construccionnan cu nomber di hotel.
Esaki ta tambe e epoca di e expedicionnan maritimo grandi, door di gruponan di spaño, britanico y portugues, cu a desperta e curiosidad y interes pa viaha.
NewsAmericasNow.com
Discussion about this post