Sindicato STA keto bay sperando un reunion cu Ministro Glenbert

Pa discuti riba e situacion fastioso na NV Elmar

ORANJESTAD (AAN): Keto bay Sindicato STA ta mira cu e situacion di e trahadornan na NV Elmar como uno ‘fastioso’.  E dirigente Diego de Cuba a bisa cu ora cu STA a drenta den e compania aki, nan a haya un situacion unda e Sindicato anterior a firma den un CAO un structura salarial nobo, aparentemente sin consulta cu e trahadornan y bay di acuerdo cune.

   Esey a pone cu tanto e trahadornan y tambe Sindicato STA mester a biba cune, y no obstante cu tabatin discusion fuerte riba e asunto, al final legalmente e CAO nobo a wordo introduci pa tur hende eynan.

   Aparte di esey, Sindicato STA a traha riba e Fondo di Pensioen pa empleadonan.  Nan tabata sa cu esun cu tabatin e momento eynan lo tabata condena pa muri, pasobra e primanan lo a bay sky-high y ningun compania of empleado lo por a bay biba cune.  E ora Sindicato a conseha cu e mihor direccion pa check esaki ta APFA, y esey ta algo cu nan a haci tambe.

   Segun Diego de Cuba, esey tabata e mihor pa compania y empleadonan tambe pa bay resorta bao di APFA.

   Despues di tur esaki, y cu e combersacion y negociacionnan andando, cu varios protesta y mas, nan tin e CAO nobo pa negocia.  Pero ora cu a bay pa sinta na mesa, loke cu nan a ripara cu loke gerencia a bin cune riba mesa ta inaceptable.  Sindicato a bisa gerencia cu nan proposicion no ta loke nan a palabra, y cu loke nan ta dunando e trahadornan aworaki ta inaceptable.  A informa nan mesora cu Sindicato STA no por firma un cos asina ey.

   Asina a reuni mas di 8 biaha, pero no por a “haya otro”.  Nan a entrega loke e trahadornan ta desea, y cu loke e Sindicato tambe ta desea pa mira den e contract colectivo nobo, pero a ripara cu nan ta demasiado leu for di otro.

   Pa nan evita cu e situacion ta escala den un accion di protesta, Sindicato STA a opta pa manda un carta pa Ministro di Energia, Glenbert Croes, pero lamentablemente nan no a logra reuni cu Ministro y nan ta compronde cu e titular di energia ta druk ocupa tratando di yega na cierto palabracionnan cu e companianan di utilidad pa baha tarifa di awa y coriente.

   No obstante esey, Ministro a permiti su expertonan di Ministerio pa atende cu Sindicato y nan a trece puntonan dilanti y nan sa cu e ta na altura di e situacion aki, sperando cu pronto e lo concede un reunion na nan tambe riba esey.